चैत १८, सल्यान ।
सल्यानको बागचौर नगरपालिका २ थारमारेमा रहेको प्रगति बचत तथा ऋण सहकारी संस्था लिमिटेड विगत २५ वर्षदेखि संचालनमा रहेको छ । संस्थाले केहिदिनमा २५ औं रजत जयन्ती मनाउँदै छ । यस अवसरमा संस्थाका अध्यक्ष प्रेम बहादुर केसीसँग गरेको कुराकानीको सम्पादित अंश ।
प्रगति सहकारी संस्थाको २५ वर्षे यात्रालाई कसरी सम्झिनुहुन्छ ?
प्रगति सहकारी संस्थाको स्थापनाकालदेखि अहिलेसम्म करिब २५ वर्ष सम्म नेतृत्वमा रहेर काम गर्ने अवसर प्राप्त गरिरहँदा निकै खुसि लागिरहेको छ । विगतको कुरा गर्ने हो भने सामान्य छलफल भएर स्थापना भएको संस्था हो ।
२५ वर्षको दौरानमा आईपुग्दा बिचमा धेरै बाधा ब्यवधानहरु संस्थामा आईपरे पनि निरन्तरको ईमान्दारिता, लगनशिलता र मेहनतका कारण संस्था आज यो स्थानमा पुग्न सफल भएको छ । आज यसरी सरसर्ति हेर्दा प्रगति सहकारी सबैको गर्व गर्न लायक संस्थाको रुपमा स्थापित हुन सफल भएको छ । यसमा सबैको सहयोग उत्तिकै रहेको मैले महशुस गरेको छु ।
संस्था स्थापना गर्दाका सुरुवाती दिनहरुलाई कसरी स्मरण गर्नुहुन्छ ?
प्रगति सहकारी संस्थाको विगतको कुरा भन्नुपर्दा स्थापनाको बखत यस क्षेत्रमा कुनै सहकारी संस्थाको बारेमा जानकारी नभएको अबस्थामा धेरै बाधा ब्यवधानहरु पनि झेल्नु परेको थियो । उचित साधन स्रोतको अभाबका बिच पनि संस्थाले आफ्नो कामलाई निरन्तरता दिएको थियो ।
यस क्षेत्रका आम नागरिक, वुद्धिजिवी लगायत सबैको सहयोगका कारण नै यो संस्था यहाँ सम्म पुगेको हो । मासिक २०० रुपैंयाँ तलब खाएर समेत यस संस्थाका कर्मचारीले निरन्तर काम गरेको दुखान्त अनुभव पनि हामीसंग छ । संस्थाका संचालक सदस्यहरुपनि रातदिन नभनेर निरन्तरको मेहनत,लगनशिलता, र इमान्दारिताका कारण पनि संस्था आजको दिन सम्म आईपुगेको हो । हामीले सही समयमा संस्था स्थापना गरेको थियौं भने अहिलेको सफलता देख्दा मलाई अनुभूति भईरहेको छ ।
२५ औं रजत जयन्ती वर्ष मनाईरहँदा संस्था स्थापनाको उद्धेश्य आजको दिनसम्म आईपुग्दा कत्तिकाे पुरा भएको अनुभुति गर्नुहुन्छ ?
२०५३ साल देखि आजको दिनसम्म आईपुग्दा प्रगति बचत तथा ऋण सहकारी संस्था इमान्दारिता र लगनशिलताले नै यो उचाईमा पुग्न सफल भएको हो । प्रगति सहकारी एक मजबुत संस्था भएको छ ।
हाम्रो संस्था हो यसलाई सबै मिलेर बचाउनुपर्छ भन्ने यस क्षेत्रका आम नागरिकको भावना विकास भएको छ । अहिले २५ वर्षमा प्रबेश गरि रहँदा संस्थाको नेतृत्व लिईरहँदा म अत्यन्तै हर्षित भईरहेको छु ।
संस्था सफल हुनको लागी के-के कुरा आवश्यक पर्ने रहेछ ?
कुनै पनि संस्थाको निति बनाएर विधिमा संचालन गर्ने हो र लगनशिल र ईमान्दार भएर काम गर्ने हो भने जुनसुकै संस्था पनि सफलतामा पुग्नसक्छ भन्ने मेरो अनुभव रहेको छ ।
प्रगति सहकारी संस्था सफलतामा पुग्नुको श्रेय क–कसलाई दिन चहानुहुन्छ ?
सबैभन्दा पहिले स्थापनाको बखत यो क्षेत्रमा सहकारीको आबश्यक्ता छ सहकारी संस्था दर्ता गरेर संचालन गनुपर्छ भनेर प्रगति बचत तथा ऋण सहकारी संस्था नामको विरुवारोप्न अहम भूमिका खेल्नुहुने संस्थापक अध्यक्ष एकदेव शर्मा लगायत संस्थापक संचालक समितिलाई सम्झिन चाहन्छु ।
यसका साथै यस क्षेत्रका स्थानीय नागरिक जसले यो सहकारी हाम्रो हो, यो सहकारीको माध्यामबाट हामी अघि बढन सक्छौं भनेर उर्जा दिनु भयो उहाँहरु पनि सफलताको हकदार हुनुहुन्छ ।
अहिले संस्थाको अबस्था कस्तो छ ? संस्था कसरी अगाडी बढी रहेको छ ?
अहिलेको अवस्थामा संस्थाको निति र विधि एकदम चुस्त दुरुस्त लेखन भएको अबस्था छ । संस्थालाई आमरुपमा स्थानीयहरुले हेर्ने दृष्टिकोण एकदमै सकारात्मक छ । पदाधिकारी र कर्मचारी लगायत आम नागरिक सबैले एकदम विश्वास गरिरहेको अवस्था छ । सानोतिनो समस्याका कारण संस्थामा कुनै असर पर्ने अवस्था छैन । संस्था मजबुत भएको छ । संस्था पूर्ण रुपमा हुर्किएर फल दिन लागेको विरुवा जस्तै भएको छ । यसकारण हामी अझ इमान्दारी र लगनशिलताले अगाडी बढ्दै जाने हो भने हामी सबैले लाभ लिन सक्छौं र स्थानीयलाई अगाडी बढाउने कुरा सम्भव छ भन्ने मेरो भनाई छ ।
अन्त्यमा के भन्न चाहनुहुन्छ ?
संस्थालाई यहाँ सम्म पुर्याउन खेलेको भुमिका प्रति हार्दिक आभार ब्यक्त गर्न चाहन्छु । आगामी दिनमा समेत यहाँहरुको भूमिकामा कमि आउने छैन भन्ने विश्वास रहेको छ । –धन्यवाद ।
